تل قران ور وړاندې ایښی، قران لولي
ولې هېڅ عمل یې نه وي په قران
ښه سړي لال و یاقوت دي موندل نه شي
لکه نور کاڼي، لږ نه دي ناکسان
په هر لوري ښه سړي چېرې لیدل شي
ولې ښه سړي به کم وي افغانان
د عفریت دی، که د دیو دی، که دد دی
د ادم له نسله نه ګڼم افغان
هره چاره د پښتون تر مغول ښه ده
اتفاق ورڅخه نشته ډېر ارمان
د بهلول او د شېرشاه خبرې اورم
چې په هند کې پښتانه و پاچاهان
یا هغه پښتانه نور وو دا څه نور شول
یا د خدای دی اوس دا هسې شان فرمان
که توفیق د اتفاق پښتانه مومي
زوړ خوشحال به دوباره شي په دا ځوان
خان علیین مکان خوشال خان خټک
